仲記得生你的時候真係好快好痛, 晚上7點幾見紅, 11點幾開始陣痛, 凌晨2點就生o左你出來啦! 生家姐冇喊, 生你反而流眼淚, 因為真係好痛。不過, 見到你健康活潑, 就咩都值。


爸爸一路陪住媽媽, 你出世第一下, 姑娘抱你俾我, 見到你真係好感動呀, 暖暖的, 覺得再一次做媽媽, 由懷上你開始, 媽媽就同你一齊經歷好多, 信主, 上堂, 受浸, 照顧家姐, 返工。係醫院你過輕又黃, 我好努力餵母乳, 餵完你又手擠, 搞到好谷, 好記得個胸實晒變O左石頭, 姑娘幫我通乳, 幫我按同推, 係好痛好痛, 比生你痛10倍, 係咁喊, 因為好痛但又要忍住, 係醫院度, 冇屋企人陪, 冇人知道幾咁痛苦(生你仲話有爸爸係度), 但係都要堅持, 一路都係諗住你, 想你可以快O的退黃啦, 快O的出院爸爸O的假唔好浪費。到出院, 同你一齊係婆婆家坐月, 那時候公公仲未出院, 爸爸又忙著嫲嫲屋企裝修O既事, 家姐仔又O岩O岩上K1, 好多時一齊發生呀, 媽媽同自己講, 要盡量幫忙分擔, 主力照顧你, 我可以做到O既就自己做啦！你黃疸度數高, 來來回回健康院, 最後要入院照燈, 那兩天就在醫院出出入入, 你出院那天, 媽媽係醫院等了醫生一日都見唔到…… 到可以出院, 抱住你, 拎住好多O野去俾錢, 再坐車返婆婆度。 之後你眼仔發炎, 又要去睇醫生, 隔幾日就去診所, 返去滴藥水, 其實都冇好好咁坐月, 有時候諗返, 我都唔知點解自己做得到。返到去順緻, 終於可以一家人一齊啦, 媽咪好掛住家姐, 加上爺爺嫲嫲一齊住幾個月, 又要重新習慣了。




有段時間你埋身食甩咀, 就只可以泵, 我主力照顧你, 沖涼泵奶洗衫, 真係好攰, 想出去行一陣街都好難, 要趕返去泵奶, 又要儲奶旅行用返工用。返工前已經可以埋番身, 真係好開心, 親餵真係俾到好大滿足感我, 讓我覺得自己真係一個媽媽。見到你食奶食到瞓著個樣, 滿足的笑容, 真係好感動。之後媽媽要返工啦, 好掛住你同家姐, 又要調節泵奶O既時間, 最初真係好地獄式, 8:30AM, 1:00PM, 5:30PM, 8:00PM, 11:00PM, 3:30AM, 每日只有11:00PM 可以埋身, 其他時間都係泵, 3:30AM 泵到4:00AM, 又唔係即刻瞓得番, 但因為8:30AM 要返到公司泵, 我6:30AM就起身了, 7:00AM出門口, 8:15AM返到公司, 真係好攰好眼瞓, 每日最後一個瞓, 你要我哄先瞓, 最早一個起身, 好辛苦哦! 之後儲夠奶旅行用, 就調節番O的時間改成7:00AM(埋身), 1:00AM, 5:30AM, 20:00PM, 23:00PM(埋), 如果爸爸接放工趕到19:00PM 埋身就最好啦。每日拎住一大袋泵奶用品返工放工, 真係好重, 仲有個飯盒, 因為泵奶, 好少出街食飯, 冇飯帶就叫外賣, 依段時間真係好辛苦, 身啦心啦… 但都過去了。


爺爺嫲嫲搬走後的周末, 要照顧你和家姐, 真係EQ大考驗, 你半歲後, 有姐姐來幫手照顧你同家姐, 真係輕鬆好多。加上六個月後你就吃一餐粥仔了, 所以媽媽又輕鬆O的, 再九個月, 兩餐粥又再輕鬆O的。姐姐來到, 我同爸爸可以有多O的真正的親子時間。之前成日放你係車仔, 我O地又走去理家姐, 你仲未識要求我O地陪你, 你會EE 哦哦, 但其實都唔明你講咩架。因為大部份時間姐姐照顧你, 所以你都識聽英文, 首先識講「媽媽」、之後「爸爸」, 「家姐」, 「THIS」, 「BIRD」, 「MUM MUM(O野食)」, 問你O野, 係唔係呀, 要唔要呀識點頭、俾。見到你O既進步爸爸媽媽就最開心！





細佬, 你係開心果, 見到人就笑, 唔怕陌生人(抱就唔得), 叫你hello, 飛吻, 拜拜永冇托手踭, 食餅餅都肯請人食, 係扭食奶o個下脾氣大o的啦, 你真係好可愛呀! 悠悠家姐大你3年, 佢好錫你好照顧你, 好鍾意細佬你, 雖然佢有時都會同你爭O野, 但其實佢仲係好細個女, 細佬, 你大個都要錫家姐, 保護家姐呀!

一家四口真係好幸福哦！但係幸福的背後係有好多家務做呢, 日頭有爺爺嫲嫲幫手照顧悠希, 但晚上放工要煮飯洗碗洗衫沖涼做功課, 想多O的時間親子講故事, 又或者係同爸爸2人世界下, 都好難呀！真係要搵多個人來幫手, 所以決定請姐姐了, 幫手做家務同照顧悠希, 希望姐姐盡快來啦！